Azərbaycan Qida Təhlükəsizliyi İnstitutu
AQTİ mütəxəssisləri tərəfindən növbəti təlim Xaçmaz rayonunda yerləşən “Qafqaz Konserv Zavodu” MMC-nin Xaçmaz Konserv Fabrikində təşkil olunub. Fabrikin əməkdaşları üçün keçirilən təlim “Qida sahələrində gigiyena tələbləri” mövzusunu əhatə edib.
Təlim zamanı qida subyektlərinin nümayəndələri “Qida təhlükəsizliyi haqqında” Azərbaycan Respublikasının Qanunu və bu qanundan irəli gələn tələblər haqqında ətraflı məlumatlandırılıb. İştirakçılara müəssisələrdə qida məhsullarının qəbulu, emalı, saxlanması, daşınması zamanı gigiyena qaydalarının tətbiqi, eləcə də təhlükəli amillər, çirklənmə növləri və digər məsələlər barədə məlumat verilib.
İnteraktiv formada təşkil olunan təlimin sonunda müzakirələr aparılıb və iştirakçıların mövzu ilə bağlı bilik səviyyəsi qiymətləndirilib.
Qeyd edək ki, “Qida subyektlərinə dair gigiyena tələbləri” mövzusunda təlim “Qida təhlükəsizliyi haqqında” Azərbaycan Respublikasının Qanununa uyğun olaraq keçirilib. Təlim qida zəncirinin bütün mərhələlərində iştirak edən sahibkarlıq subyektlərinin əməkdaşlarına müəssisələrin fəaliyyətinin qanunvericiliyin və sanitariya-gigiyena qaydalarının tələbləri çərçivəsində təşkil olunması üçün zəruri məlumatlar vermək məqsədilə keçirilib.
